1 jeltoqsan – Qazaqstan Respýblıkasy Tuńǵysh Prezıdenti kúnine oraı, M.H.Dýlatı atyndaǵy Taraz Memlekettik ýnıversıtetinde «Uly dalanyń Uly perzenti» atty Elbasy týraly jazylǵan kitaptardyń avtorlarymen kezdesý keshi ótti.
Áýeli kelgen qonaqtar arnaıy uıymdastyrylǵan kitap kórmesimen tanysty. Onda Elbasynyń jazǵan eńbekterimen qatar, Elbasy týraly kitaptar qoıylyp, Elbasynyń ómiri men eńbek jolynan mol derekter qamtyldy. Sodan keıin kelýshilerge Elbasy týraly derekti fılm kórsetildi. Jıynǵa kelýshiler munda Memleket basshysynyń jýyrda ǵana Jambyl oblysyna arnaıy kelgen issaparyn tamashalady. Budan keıin keshtiń saltanatty ashylý rásimi ótip, keshti ýnıversıtet rektory Mahmetǵalı Sarybekov júrgizip otyrdy.
Áýelgi sózdi Jambyl oblysynyń ákimi Kárim Kókirekbaev alyp, Elbasynyń eren eńbegine toqtaldy. Ákim óz sózinde Memleket basshysynyń qamqorlyǵyn jambyldyqtardyń da jete sezinip otyrǵanyn jetkizip, óńirde túrli jobalardy iske asyrýda Elbasynyń mańyzdy rólin atap ótti. Al Memleket tarıhy ınstıtýtynyń dırektory, tarıh ǵylymdarynyń doktory, professor Búrkitbaı Aıaǵan Elbasynyń ár jyldary jazǵan tarıhı-saıası eńbekteriniń mańyzdylyǵyn aıtty. Ǵalym óz sózinde Elbasynyń árbir eńbegi qazaq eliniń damý baǵdaryn aıqyndap, keleshekke jol siltep otyrǵanyn da jetkizdi. Sonymen qatar, «Qazaqstan» ulttyq telearnasy Basqarma tóraǵasynyń orynbasary, Qazaqstannyń Eńbek sińirgen qaıratkeri Qaınar Oljaı óziniń jýrnalıstik qyzmetindegi Elbasynyń shet memleketterge issaparyn jazý barysyndaǵy este qalarlyq oqıǵalarymen bólisti.
Jazýshy, jýrnalıst Aıtbaı Sáýlebektegi Elbasy ómirinen kitap jazý qyzyq ári qıyn ekenin aıta kele, ózi Elbasy týraly kitap jazý barysynda mol maǵlumattarǵa qanyqqanyn aıtyp ótti. Elbasy alǵash eńbek jolyn bastaǵan Qaraǵandy oblysynyń Temirtaý qalasynan bastap, Máskeýge deıin barǵanyn, sol sapary barysynda Elbasy týraly kóptegen mańyzdy derekter kezdestirgenin áńgimeledi.
Jalpy, Elbasy qamqorlyǵymen «Bolashaq» baǵdarlamasy aıasynda elimizdiń myńdaǵan jastary álemniń aldyńǵy qatarly joǵary oqý oryndarynda bilim alyp keledi. Elbasynyń bul bastamasy talaı jastyń tuǵyrǵa qonýyna yqpal etkenin aıtqan «Bolashaq» halyqaralyq stıpendııasynyń ıegeri, Qazaqstan jastar Odaǵy «Serper» syılyǵynyń laýreaty Qanat Áýesbaı táýelsiz qazaq eli úshin aldaǵy ýaqyttarda eńbek etetinin jetkizdi.
Hamıt Esaman, «Egemen Qazaqstan»
Jambyl oblysy